20120317 新車落地油甘頭元朗之旅

３／１６買左新車，Ｃ記ＳＬ３，雖然唔係咩貴車叫做入門級ＭＴＢ，不過在我黎講已經ＯＫ的了。

Cannondale SL3

第二日即刻試下架車啦，約左朋友先上油甘頭汀九引水道再經青公到元朗雲鵬『吸毒』。先由黃大仙踩到荃灣西站集合，需時一個小時多一點點吧，等齊人之後就經麗城下油甘頭了。

由此路上

一開始就先黎兩個髮夾彎，上之前轉定細餅就岩架了，如果唔係分分鐘轉唔切。之後會見到ｔｕｎｎｅｌ一條，大約１：８左右吧，咁就差唔多到油甘頭村了。

油甘頭村

過左村再上既路就無咁斜，好快就上到引水道的了，見到右手邊有個公廁就表示已經到頂了。到頂後是分岔路來的，右手邊是往荃錦公路而左手邊就是今日要走的路，可以落番去青龍頭的。

指示牌說入內後果自負

有路牌清楚指出

沿引水道走一路都是平路，只要小心有些地面因樹根關係凸起就ｏｋ了。無耐會見到個開揚的位置可以影到汀九和青馬橋，先不要急，再走前一點會見到個亭，那個是更好拍照的位置。

呢個位ｏｋ　再前一點更好

呢個位夠哂開揚，等天色好一點會再來拍照的

再向前走就會有一個路口落青龍頭的了，如果你不趕時間的話可以再踩前ｄ，有一條小瀑布，引水道旁的路的盡頭是一個引水道ｔｕｎｎｅｌ，應該是通住大欖水塘的。沿路一直下坡就會抵達青龍頭（橋底那酒店的還不知它的名字）。

汀九橋底

跟著就沿青公到三聖村午餐。

青龍頭碼頭

黃金泳灘

食飽之後沿全港至『好』的單車徑入元朗，睇車友買野換野之後就西鐵回家了。

20120310 紅花嶺之旅

之前一直打算挑戰九龍坑山，紅花嶺等新界北的高山，奈何一路擔心路況不好，ＢＩＲＤＹ不勝負，不過這天終於的起心肝一個人出發到紅花嶺去了。又怎知道這次是我跟它最後一次郊遊呢！

紅花嶺是香港新界北部的一座山峰，位於打鼓嶺以東、沙頭角以西，海拔498米（車路最高點大約４３０米左右）。紅花嶺的北麓屬於香港邊境禁區範圍。先乘火車到大埔踩入鹿頸熱身。

新娘潭路旁

抵達鹿頸先在陳鳳記吃一個英式早餐，補給之後向沙頭角方向前進，到沙頭角公路路口轉左，沿公路一直走見到堆填區路牌轉右到入禾徑山路。（如果係上水方向入見到路牌就是轉左）

堆填區轉右

禾徑山路

呢條路有好多貨櫃車同泥頭車駛過的，留心佢地過的時候要保持車身穩定。無耐左手面有個路口有個牌寫住紅花嶺路，不過上山唔係係呢度入的，入口係係前少少對面馬路有個廢車場，進入果條路之後見到有條窄車路，路邊有黃色欄杆就知道走對了。

唔好係呢度轉上去呀，雖然都係上斜

呢條路就對了，便上吧

一開始已經唔係講笑，斜度我估計在１：８到１：６左右吧，加上地上一坑一坑的防滑措施，我踩了幾百米就投降下車推了。上完第一段斜之後都是一些緩坡呀平路呀，甚至有點下坡給你機會回回氣，之後就要繼續上了。

上圖是意志力的考驗，當你氣來氣喘上坡的時候，你見到前面那座山山眼豎著一支支黃色的欄杆，心想仲有幾長要上呀，真心說有一刻想回頭。

ｓ彎咁上

第二個難關就是上圖那個ｓ彎，就算走外彎都很吃力，比上大帽山最後一段的髮夾彎還要斜。再前一點就見到發射站了。

見到發射站了，不過好似仲有好遠

一路半推半踩終於都上到最後直路了，回頭望最後一條斜（我是推上來的），我估計一定不只１：６。

呢條斜真係唔係講笑

大約用左半個小時左右，連推帶踩終於都上到頂（車路盡頭）了。ｇｐｓ顯示高度是４０９ｍ（以鹿頸士多為零計）。

發射塔下

車路盡頭，上網看ｍｔｂ師兄可以一路上，從另一邊下山回沙頭角

把車手台上發射塔旁，山的另一邊就是深圳了

下山了

正所謂上山＿＿落山難，有兩三段路也不敢直衝下去，要下車推下坡，除了上次在深屈試過之外都未試過了。

落番山腳沿沙頭角公路到粉嶺火車回家，稍息之後再ｊｏｉｎ朋友上飛鵝山一轉。

天氣不好

今日真係夠哂皮，上坡加埋差不多有一千米，當上左一次大帽山啦。

今日路線：http://www.endomondo.com/workouts/nBLnSMfq0mM